大澳半日遊 + 打邊爐

日期: 07 April 2012

竟然漏左篇大澳之旅未寫, 俾朋友仔催添...

趁復活節長假, 同朋友仔一行4人去大澳半日遊...

可能因為長假期關係, 雖然3點幾先去到東涌, 但係去大澳既巴士站依然大排長龍... 好在巴士都有好多, 所以都好快上到車...

經過大半個鐘車程, 終於都到啦... 不過一轉入去永安街, 嘩... 人山人海到, 直頭係水洩不通, 真誇張...


名稱: 益昌小食店
地址: 大澳永安街

幾經辛苦行到益昌, 朋友仔話呢間豆腐花好滑, 咁就坐低食下野, 叫左豆腐花, 魚旦, 臨走前仲買左熟蝦醬同XO醬...

食完又繼續行, 終於見到條河同排屋, 不過好似同係電視見到既唔係好同, anyway, 行下行下, 又行到去吉慶街...

吉慶街當然又係人山人海, 幾乎每檔小食都係大排長龍, 於是決定兵分兩路去排, 我去排"炭燒雞蛋仔"伯伯, 朋友仔排沙翁, 不過排到一半雞蛋仔伯伯話已經賣晒... 咁唯有去排"蝦豬餅"...

名稱: 張財記蝦醬
地址: 大澳吉慶前街41號地下

"蝦豬" 英文即係Husband, 即係豬肉碎用蝦醬炒再加生菜絲, 用薄餅(Roti)包住食... 肉碎炒得好好味, 又唔咸... 正...

名稱: 大澳餅店
地址: 大澳吉慶街

食完蝦豬餅, 朋友仔都未排完沙翁, 真係耐... 等了又等, 終於有得食, 即炸即食, 熱辣辣, 都唔錯...

名稱: 新星海鮮酒家 地址: 青衣牙鷹洲街8號灝景灣商業大廈4樓

離開大澳, 去左東薈城行左個圈, 之後就去青衣打邊爐, 朋友仔介紹呢間, 8點半去到仲有特價任飲任食...

湯底可以跟"花彫肥牛", $9x, 果然比任叫個d正... 體力勞動完叫左好多野食呀, 不過又係眼闊肚窄, 最尾都食淨幾多野...

飲下食下傾下, 又渡過左愉快既一日...